Os museos integrados na rede museística provincial, dependentes da área de cultura e turismo da Deputación de Lugo, foron galardoados nos V Premios Solidarios, que convoca anualmente a Once-Galicia. En concreto, o premio foi concedido á rede museística lucense, na categoría de accesibilidade universal.

O xurado destacou, con especial interese, o programa 'Pelexamos polo posible, loitamos polo visible', que dende 2008 se desenvolve nos catro museos que conforman a rede e no que se mostra un importante labor de sensibilización e esforzo ao levar adiante un paquete integral de actuacións de accesibilidade nos edificios dos museos, así como tamén a normalización da participación do colectivo de persoas con discapacidade en todas as actividades programadas polos centros da rede.