Bolsas Fundación Carolina-Universia 2012-2013, para estudantes iberoamericanos con discapacidade

A Fundación Carolina convocou as bolsas 2012-2013 para estudantes iberoamericanos con discapacidade, unha iniciativa que pon en marcha coa colaboración da Fundación Universia, co fin de fomentar e contribuír a facer efectivo o principio de igualdade para as persoas con discapacidade.

Segundo informaron as dúas entidades, a convocatoria 2012-2013 do Programa de Bolsas da Fundación Carolina inclúe renovacións de axudas para doutorados e novas concesións para o programa de mobilidade de profesores e investigadores brasileiros.

O número de bolsas e axudas ofertadas no Programa de Formación ascende a 609, que se analizan do seguinte xeito:

• 406 bolsas de postgrao (366 bolsas de nova convocatoria e 40 renovacións de bolsa)
• 151 renovacións das bolsas de doutorado
• 52 bolsas de Mobilidade de Profesores Brasileiros

O presente programa de axudas complementarias está dirixido a persoas con discapacidade acreditada e que fosen beneficiarias dunha bolsa de Fundación Carolina. O obxectivo desta iniciativa é facilitar e promover a ampliación de estudos de licenciados universitarios, así como a especialización e actualización de coñecementos de postgraduados, profesores, investigadores, artistas e profesionais procedentes de América Latina.

A primeira fase da convocatoria das bolsas está aberta ata o 30 de xullo, mentres que a segunda recibirá solicitudes dende o 3 de setembro ao 31 de outubro de 2012.

Para obter máis información e/ou realizar a solicitude, consultar a web da Fundación Carolina